Djudeo-espanyol


David Benbassat-Benby a conversé à bâtons rompus avec Moïse Abinun, auteur du livre :  

Les Lumières de Sarajevo

 D.B.B.Tu te yamas agora Moiz Abinun, ma en tu chikez komo te yamavan en kaza : Moiz o Moshon ?

 M.A. En Yougoslavia mi padre me yamava Moiz, alguna vez Moris; si es mi nono, el me yamava Mushon, “Mushoniko, ven aki”, porke el me avlava lo mas muncho en espanyol.

D.B.B. Yo me akodro ke en Salonik, onde pasi una parte de mi chikez, se uzava a dizir Moshiko al lugar de Mushoniko.

M.A. Salonik, Estambol i Sarajevo fueron sivdades ke tuvieron relasiones yenas de intimidad la una kon la otra. Kuando mi tia Bohoreta se iva a Estanbol eya mos trayia kantikas de ayi i mos las kantava a Sarajevo. Es muy enteresante de ver quantas idas i venidas avia entre estas sivdades. En mi livro “Les Lumières de Sarajevo”, el avlar empleyado en djudeo-espanyol es kaji el mizmo del avlar de Salonik o de Estambol, kon diferensias en la pronunsya kuando en un biervo la letra “i” toma el lugar de la letra “e” o la “u” el lugar de la “o”. En Yugoslavia mozos diziamos «El Dio ke “ti” de » al lugar de “te” de ; de mizmo, “kumer” por “komer”, i mas.

D.B.B. Djustamente esto es lo ke me aharvo el ojo en los poemas de tu ija Clarisse Nicoïdski, i sovre todo en su kuento maraviyozo “La Vieja”. I en Bulgaria se puede dizir lo mizmo. Entre los Djudios de este paiz el empleyo de la “i” al lugar de la “e” es mas demazia. Por enshemplo, avlando del fuego de Ruschuk eyos dizen : “No dimandis, no dimandis si kimo Ruschuk intiriko intiriko”. En Estambol o en Salonik se dize “No demandes, no demandes se kemo Ruschuk enteriko enteriko.

M.A. Ya es verdad. Esto es el modo de avlar de los Djudios de orijen slava i en partikular de Bulgaria. I en Yugoslavia esto se remarka mas muncho en las sivdades de la Makedonia komo Skopje (Üsküp), Bitola (Monastir) ke se topan muy serka de la Bulgaria.


D.B.B. Podemos dizir tambien ke en los paizes balkanikos : Gresia, Bulgaria, Yugoslavia, ke bivieron kaji sinko siglos basho el Emperyo Otomano, los Djudios sefaradis tomaron de siertas linguas, en partikular de la lingua turka, un alay1de palavras i expresiones i las adjustaron a la lingua ke sus avuelos trusheron kon eyos de Espania. Es esto ke a vezes echa mas sal i pimienta al linguaje popular del folklor djudeo-espanyol !

Bueno... Avlaremos agora si keres de tu padre Samuel Abinun. En Sarajevo tu padre era de su ofisyo un haham,. Kuando te engrandesites, no kijites azerte i tu haham komo tu padre ?

M.A. Mi padre Samuel era un haham komo se deve i muy konsiderado. Kon esto si te akodras lo ke dishe en mi livro, disde su chikez mi padre dezeava ser un orero porke konosiya el mekanizmo de todo modo de oras i era kapache de adovarlas todas. Su esfuenyo era de ser el patron de una butika de orero. Ya savemos ke el goral2de un ombre no esta siempre en sus manos : mi padre se izo rabino solo por un neder3ke aviya tomado kuando estava kumpiendo su dover de soldado en la primera gerra mundial. Estava kaminando delantre de su komandante kuando un obus enemigo le kayo detras de el i mato al komandante, i por su mazal, a el lo ferio solo. Mi padre ke vido ansina la muerte de serka, dando lores al Dio Baruhu, en su orasyon le djuro de azerse haham si lo deshava en vida. Ansi fue ke kuando salyo del ospital, mi padre se metyo a estudiar la Tora i kon el tyempo se izo haham i kedo haham fino a su muerte.

Me demandates si no kije i yo azerme haham komo mi padre. Komo ijo de haham i buen djudio en mi chikez yo me iva al Talmud Tora i ansina aziyan la mas grande parte de los ijikos de muestra komunita de Sarajevo. Esto no keria dizir ke mi goral era de ser haham. Kuando tuve 15-16 anios, yo kije ganarme la vida mia. A esta edad en un mansevo se empesa a avrir el meoyo i kere azerse benadam4. Ansina yo no kije ir mas adelantre en mis estudios porke mi dezeo era de alivianar un poko a mis parientes la karga de una grande famiya. Te dire mas, a mi me agradava tambien ver mundo ! Por esto me dishe un dia de mi para mi :”Mushon, si keres ver mundo ti primi ganar paras”. 

Ansina fue ke deshi los estudios i empesi a lavorar en una shastreria para azerme, komo se dize en Fransia, un “ouvrier qualifié”, fina ke me ize shastre, i esto fue mi ofisyo por toda la vida. 

 D.B.B. Kedi muy enkantado meldando en tu livro ke tu tio Izak tenia relasiones kon la famiya de Gavrilo Prinzip, el matador a Sarajevo de François-Ferdinand, ke kavzo la primera gerra mundial. Es verdad esto o se trata de bavajadas i patranias5 ?

M.A. No se trata ni de bavajadas ni de patranias ! A mi tio Izak le plaziya muncho azer el barragan. El frekuentava kon un ermano de Gavrilo Prinzip, el kual de vez en kuando viniya a vijitarlo en su kaza, ma no kreyo ke mi tio fue mesklado de serka o de leshos en la matansa del arshiduke François-Ferdinand. Muy probabilmente mi tio Izak no teniya haber de nada. Lores al Dio muestra famiya no tuvo komplikasyones kon la polisia austriaka.

Syendo ke me avlates de Gavrilo Prinzip, yo te vo kontar una otra koza. Segun ya te dishe mi padre Samuel izo la primera gerra mundial, ma su dover de soldado el aviya empesado a kumplirlo antes de la deklarasyon de la gerra. Por su negro o buen mazal, a mi padre le kayo la karga de guadrar a Gavrilo Prinzip en prizyon. Su dover fue de ir i vinir, kon el plomo en la mano, delantre de la puerta onde el asasino estava enserrado, i de vez en kuando echar un ojo por la serradura.

D.B.B. En una otra parte de tu livro estas kontando una koza ke me izo sonreyir. Meldi ke un dia te akontesyo de komer puerkopor la primera vez. Es por saver ke gusto i ke savor teniya ?

M.A. No, no es por kuriozita. Era kuando yo aviya apenas empesado a lavorar para ganar mi vida. Un dia, saliendo de mi lavoro teniya muncha ambre. Era manseviko, kon pokas paras en la aldikera ke no me abastavan para merkarme lo ke keriya. El puerko kostava barato, me merki un pedaso, kumi un poko i me dishe “no esta negro esto”.... ma te vo dizir una koza : me kumi la meata, la otra la echi, me espanti, no sea ke me entosege por mi pekado !  

Moïse Abinun et David Benby
Comments