Las de sulutcha



La tia de Sulucha i los padres

- Sulucha, ya me alegri ke se arrekayentó el aver, i ke puedemos salir a kaminar. Se espajaron las nuves i salyo el sol. De tura ke seya!

- Oy es Alhad, i no tengo lavoro. Ayde, tia, aprontate, i vamos al park endjuntos. Ya apareji un piknik de chuparse los dedos. Tengo bulemikas de kezo, prasifuchi, keziko blanko, pipinikos, domates, buletes de pirishil i boyikos de pimyenta, ke djusto ahora kiti del orno.

- Vamos a pye, ke tengo ganas de kaminar. El park no esta muy leshos. I si vemos Mr Williams kon su perro Porky, le damos un gostijo, para ke sepa la savor de la komida muestra.

- Si, i kaminando vemos uertas, arvoles i flores.

- Mira ke ermozura : ay una mezika al lado del lago. Si moz asentamos aya, vemos de una parte las barkas, los patos i los pasharos, i de otra parte, la djente, los perrikos i la vedrura.

- Ya parese ke estamos en ganedem. Te trushe la gazeta para ke meldes los dedikodus gallezes.
1

- Todo bueno ke tengas! Esta tan ermozo, ke me kero kedar aki dia entero. Ama, estas oyendo un bruido?

- Ke bruido, tia?

- Estas vyendo esta meza yena de ombres? Vino una kreatura yorando i se echo en los brasos de su padre.

- Atyo, razon tyenes. Parese ke el ijiko se kayo embasho : tyene sangre en los dizes, i el pantalon esta arazgado.

- Agora esta vinyendo una ijika kon la kara preta de dondurma de shokola. No solo se la embatako la kara, y el fostaniko blanko se le izo marron!

- Tia, echaremos un oido para saver lo ke dizen los padres

- Sulucha, de kualo estan avlando?

- Estan diskutyendo de los rezultados de match de rugby.


- I no deke no se okupan de las kreaturas? Ya me vinyeron soflamas : otro ijiko se kayo a l’agua i esta echando chios porke no save nadar. Neyse, parese ke este ijiko grandote lo esta metyendo en sus ombros para salvarlo. Deke no se menean los padres?

- Parese ke no tyenen la entisyon de bozdearse el istif : agora estan avlando de crickett!
- Komo de padres son estos?

- Te eksplikare, tia : estos padres vinyeron aki el dia de alhad para amostrar a la djente ke son padres buenos, i ke saven okuparse de sus ijos
- Son kandelikas de la plasa!!! I el paseo muestro mo lo izyeron sehora!

- Mira, tia, sigun las estatistikas de la Gran Bretanya, el 20 % de famiyas kon ijos de manko de 16 anyos son famiyas sin padre. Las madres se okupan de sus ijos, i los padres los ven kuando pueden. Komo keres ke estos padres se ambezen a engrandeser ijos?

- Ya entendi, Sulucha, estos son los padres de fin de semana!!!

Renée Martin
reneemartin@beeb.net

Mucha myel bulanderea

En el vizindado muestro, en el mizmo kortijo, bivia Eli kon su padre. Eli era un uerfano, ma no hue nunka mi amigo, porke entre mozotros avia una grande diferensya en anyos. Kon mis sesh ermanas, se entendiya mas mijor.

En vezes venia a komer ande mozotros. Se asentava a la kyoshe de la meza arrepozadiko, muy timido, arresentado, apenas komia u avlava. Era muy delgado, mal komedor, i mal vistido. Mi papa ke tenia una mano avierta, i mi mama ke tenia un korasón de oro, tenian piadad de este ijo i la djente mezmo dizia ke la famiya mia lo avia aporfizado. Su vestimyenta era siempre vieja, uzada, u regalada por el “Malbish Harumim” la sosyeta de byenfezensya ke mi mama prezidia.

Eli apenas komiya, kon la kara mirando solo el tchini suyo, i solo se le avrian grandes los ojos kuando mis ermanikas, después de komer, se metian a kantar.




               
Poveretiko. Despues, el se iva repozado como avia vinido, bezando la mano de mi vava i de mi madre, para ayudar su padre a vender borrekas.

Mis ermanikas, viendo ke le plazia kantar, i ke tenia una bos dulse i klara, fuerte i ermoza, empesaron a komvidarlo a kantar kon eyas. Todas mi ermanikas kantavan muy ermozo i djugavan el pyano. Tenian todas un talento para la musika, i kada una en su manera alumbrava el korasón de mis parientes. Yo hui el uniko ke no savia o pudia kantar, no supe lir notas, ma malgrado esto me tomavan para aboltar las ojas.

Yo mirando komo mis ermanas djugavan kon kuatro manos el pyano, empesi a akodrarme kuanto era nesesario para aboltar las ojas, ma todo esto era leshos de kantar. Kon el tyempo mis ermanas salyeron a kantar en el publiko, a la okazyón de una fiesta u otra en el “Bet Am” u en kazas de amigos.


Un dia toda la keila djudia se apronto para selebrar la fiesta de Hanuka en la grande sala del “Beit Am”. Tomaron i Eli, a mi me desharon en kaza.

Entre los aparejos de la fiesta avia la merkada de pantalones para Eli. Komo el era delgado i chiko, los pantalones ke merkaron le hueron muy largos. El vino ande mi vava para demandarle de akurtarlos. Mi vava okupada kon los fustanes de mis ermanas, no tupo tyempo, i le refuso, embiandolo a los otros membros de la famiya. Eli bushko enprimero mi mama, dospues mi ermana, i a la fin mi tia. Todos estavan okupados i le refuzaron. El desho los pantalones sovre el sesto al lado de la entrada de la kaza.

La noche antes de la fiesta, mi vava teniendo piedad de Eli, tomo la tijera, korto unos 2 sentimetros, i lo akurto en metiendo de muevo el pantalón sovre el sesto. Ayi lo topo mi mama, ke de mezmo le izo mal de refusar a Eli, i eya akurto el pantalón de 2 sentimetros. Sin saver esto, mi ermana, i después mi tia, akurtaron el pantalón i lo metyeron sovre el sesto.

El dia de la fiesta, todos se vistieron elegantemente i Eli tomo sus patalones. Del sesto. Ke vido el poveritiko en metiendolos?…… los pantalones akurtados le vinian solo fina las piernas. Una desgrasya, ke verguensa!!! Se emmudesyo…
No avia mas tyempo para trokarlos. Imajinavos ke me tomaron a mi a la fiesta para aboltar las ojas.

Rivka Abiry*
Comments