- Sulutcha, kontame komo estuvo la fiesta de Suzanika - Tia, mos engleneyimos muncho fina las tres de la demanyana - Alegres i gustozos ke estej syempre. Kuanta djente avia en la fiesta ? - 23 mujeres. - Atyo, solo mujeres ? Ande estavan los ombres ? - Esta fiesta era una “hen party” - Hen party ? Para mujeres henozas ? - No tia, la hen party es la fiesta ke aze la novya kon sus amigas antes de kazarse. Hen kere dizir gayna. - Me paresyo ke tu amiga Suzan ya estava kazada. Ke edad tiene ? - 50 anyos. - Dospues de los sinkuenta se va kazar i va engrandeser ijos ? Ya lo desho muy tadre! Bueno, kualo ke te diga, mazaloza i venturoza ke sea, i ke tenga munchos ijos. - No te merekiyes, tia, ke Suzan ya tiene un ijo i una ija grandes. - Barminam, tuvo ijos sin kazarse ? - Si, i la ija eskojo el fostan de novya de la madre, i el ijo eskojo la araba para ir a la boda - Parese ke esto es echo de Inglezes. I kuando hue la boda ? | - La semana pasada - Ya no me dishites ke la fiesta de las gaynas se aze antes de la boda ? Tu amiga izo todo a la roves: en primero tuvo ijos, dospues se kazo, i a la fin izo la fiesta - Ya tienes razon, tia, en este pais no es solo el trafik ke kamina a la roves, mizmo las famiyas son a la roves. Kualo vas azer ? Komo dizen los italianos: “Paese che vai, usanze che trovi”. Renée Martin
|
 | |
|
|