El Kantoniko de Chochana, Jurnaliko Amigo - Chochana Lucie Mazaltove



Seyas el byenvenido en este diya de Primavera. Kon un sol  ke arelunbra mizmo las pyedras las mas viejas. Despues de unos kuantos tyempos de soledad i kon un poko de tristeza, agora devemos de tomar el filo de muestras konversasyones.
Kuando digo esto, ya me entyendo. Por modo, la sola ke avla so yo.

Ansi bivan tus pulgas, no me digas el kontraryo, i kon mi no tengas grandeza : a la fin del kuento, no sos ke una oja de papel.

Ma jurnaliko presyado, grasyas al Dyo ke egzistes.

Ansi puedemos konfyarte todos muestros penseryos. Ayde, no te aravyes !
Dame la mano ! Por dolor ! Ke mano me vas a dar ? Aman aman ! no dishe nada ! Azeremos Chalom !

Trokando de campo, avlaremos de otra koza.
De kualo por el amor del syelo ? El klima ? tuerto ! La politika ? tuerta. La finansya ? tuerta ! La salud ? komo kyere el Dyo!

Alora, nada ke vayga byen ? Si, la amistad, la kerensya, la fraternidad i el respekto de los unos para los otros.

Vites, jurnaliko ? ya intchi tu oja.
Ma vo azer mijor la otra vez.

Te digo buen koraje i lunga vide a muestro djornal !


Chochana Lucie  Mazaltove








Comments