Muestra lingua : Las de Sulutcha

Le succès rencontré par le récit des conversations entre Sulutcha et sa tante d’Estambol en visite au Pays de Galles incite Renée Martin à poursuivre ces bavardages : lisez plutôt!

La tia de Sulutcha i los viruses

- Sulutcha, parese ke topi un virus muevo.

- En ora buena, tiya, ke te afito? Estas hazina?

- No, benditcho el Dyo, ya esto buena. Ven, hanuma, te eksplikaré. En primero aviyan los viruses de los doktores. Kuando te aziyas hazina, si el doktor no era kapatchi de entender lo ke teniyas, te diziya ke teniyas un virus i te dava un antibyotiko. Ansina te se asemejava ke era un ombre muy savido.

- I kual es este virus muevo?

- Pasensya, hanuma, no me kortes la palavra. Dospues de los viruses de los doktores vinyeron los viruses de las komputadoras. I para esto toparon lojisyeles ke matan los viruses.

- I agora?

- Agora vino un virus muevo, ke mos va matar la lingua muestra. Se yama el virus del espanyol moderno. Kada vez ke los muestros viajan a Espanya, se ambezan la lingua de los Espanyoles i se meten a avlar i eskrivir komo eyos. Estan tomando un yampish muy negro.

- Guay ke mos vino! Para este virus no ay ni antibyotikos ni lojisyeles antivirus.


La tia de Sulutcha i los antropologos

- Tiya, mira kualo me vino. Un antropologo famozo de las Amerikas me eskrivyo una letra elektronika, i me tresali de meldarla.

- I komo te topo?

- El Dyo solo lo save. Agora el mundo es tchiko, i kuando se bushka en la tiralanya,1 se topa todo.

- De ke tiralanya me estas avlando, hanuma? En las kazas de Estambol las tiralanyas sirviyan solo para apanyar moshkas. Parese ke las tiralanyas inglezas saven apanyar mi sovrina!

- Ah, te eksplikare, esta es la tiralanya de las komputadoras, lo ke los Inglezes yaman el Web.

- So muy vieja para entender estas kozas : kontame lo ke te disho el antropologo.

- Este antropologo es muy savido. El bivyo entre los Indyos de las Amazonas i estudyo muntchas tribus de por aya. Ama agora, zavaliko, ya no kedaron mas tribus, i se kedo sin etcho. Kuando tuvo haber de muestra komunita, se entereso en mozotros i se metyo a estudyarmos.

- Kualo? Le paresyo ke mos metemos plumas en la kavesa i ke kaminamos medyo dezmudos en las kayes?

- No, tiya. El kere ambezarse muestra lingua i muestra kultura.

- I le paresyo ke va topar una tribu ande se avla muestra lingua? Mira, los djudiyos de Turkiya ya no endenyan avlarla. Unos pokos de los ke moran afuera ya keren avlarla, ama estan kada uno en su vanda. Dizele a tu profesor muy savido ke no se ezvaneska : muestra tribu ya no egziste.

- Tiya, no seyas tan pesimista. Agora tenemos la komunita virtuala, i tanto ke la djente eskrive en muestra lingua no mos muriremos.

1Tiralanya = telaraña en espagnol moderne. En judeo-espagnol la tiralanya designe l'animal, tandis qu'en espagnol moderne, telaraña est la toile d'araignée.


La tia de Sulutcha i la vida barata

- Sulutcha, la vida moderna es una vida muy kolay i barata.

- En ora buena, tia, dande kitates esto?

- Avre los ojos, ijika. Agora kuando keres mandar una letra a una amiga, la eskrives en la komputadora i la amiga la aresive pishin, i sin pagar un grosh. Al tyempo en Estambol, kalia merkar papel, pluma i pules, i dar un bahshish al postadji para ke te yevara una letra solo de Hasköy a Balat, i no a la otra vanda del mundo.

- Ansina aziyaj al tyempo? I mas kualo aziyaj?

- La mosa Sarula, ke este en ganedem, lavava i fregava dia i noche sin kedar. La povereta, se le auflavan las manos de tanto lavar. Agora tenej una makina para lavar, i otra para fregar. No tenej menester de pagar una mosa. Para la uerta teniamos el bahchavan Mehmet Efendi ke mos kostava una fortuna. Agora tenej makinas para kortar la yerva.

- Tia, lo ke dizes ya esta djusto, ama agora ke tenemos tantos kolaylikes para azer los echos de kaza, no estamos aziendo egzersisyos i mos estamos engodrando. En lugar de gastar la para en mosas i bahchavanes, estamos gastando la para en kalsados i vistidos de jimnastik i en makinikas de egzersisyos.

- Kualo ke vos diga, ijika, el Dyo ke vos de meoyo!

Renée Martin • reneemartin@beeb.net

Comments