Amor

dime onde

se piedren la luna djunto al sol

i se tornan amantes.

Onde se eskuresen tus ojos

kuando yega el esfuenyo.

onde se van los amores

ke no kresen…

Onde se kedan los ijos

ke no vienen…

Amor

dime onde

te yeva mi risa

onde te kedas vazio

onde se eskapan los ulvidos…

onde se piedre tu mirada

kuando no sto kon ti

onde puedo trokar 

el miedo en alegria…

Kualo es tu poder, senyor ? 

ke tornas lo muevo en viesho

lo viesho en muevo

i azes dispareser personas.

Kuala es tu lus,

ke se troka en miliarias

de reflektos en la nochada

para arelumbrar mis ojos…

Kualo es tu mundo

ke si puedo 

vo kerer en el bivir

i saver de sus secretos

Kuala es tu mayor virtud

Dio mio

para asemejarme a Ti

soltanto en un sospiro.

Kualo es tu amor

ke se desbodra

i puede toparse aki i agora

i en unotros sientos de sentires.

Kualo es tu nomvre

tan sagrado, tan limpio, tan ancho

ke lo kero yevar en mi mente kada dia

i en mi boka kada ora…