Enkontros de amistad


Los Primeros Enkontros Internasionales sovre el Djudeo-Espanyol fueron konvokados kon el buto de lograr una mijor kolaborasion entre todos los faktores en las diversas partes del mundo ke ovran para la konservasion i promosion de la lingua djudeo-espanyola. Otro buto, muy importante el tambien, era el de permeter a los ke son aktivos en este kampo, de enkontrarsen i konosersen personalmente afin de krear relasiones de amistad, munchos de entre los kualos no se konosian de antes.

De estos puntos de vista, no meno ke del de las rezolusiones ke fueron adoptadas, estos enkontros tuvieron una ekstraordinaria reushidad. Los Enkontros sovresalieron tambien por la atmosfera kordiala i amistoza ke fue konsentida todo el tiempo.


Esto mos permete de esperar ke avra una mas grande kolaborasion entre las asosiasiones i institusiones de diversas partes del mundo ke lavoran para la konservasion i promosion de la lengua djudeo-espanyola i de su kultura en un esforso de ultima ora afin de salvar del olvido la erensia kulturala ke fue transmetida de una jenerasion a la otra durante sinkos siglos i esta agora en peligro de deperderse.

Grasias a todos.  

Moshe Shaul 


Comments