Empesimos muestros aparejos para el viaje de tres semanas a Florida. Vino el dalkavo dia. Echi una ultima mirada al doredor del apartamento y dospués, al balkon. Ayi no manki de topar una chika domat en el saksi. Ke surpriz!!! Una unika domat en su ermoza kolor kolorada enkolgando i repozando sovre la planta. Presto la arranki i la echi en mi enorme i grande chanta, kon la entisyon de komerla kayadika i kon plazer en el avion. Ma las okupasyones durante la salida me izyeron olvidar de este pedasiko maraviyozo. Ansina alkansimos a Miami. En la sala del aeropuerto, para tomar atrás el bagaj muestro, mos metimos a la kola komo munchos otros viajadores. Estavamos kansados, ma kon buenas iluzyones. Ma kualo ven en supito mis ojos ? Un perro, de la rasa Beagle, meneando su kola, i aserkandose de mi entre todos los ke estavan en la kola para tomar el bagaj. Se kedo a mi lado, djusto delantre de mi, i yo mirandolo kon ojos de amor. Me muero por los perros El empeso a meter su mutra en mi chanta ke estava medio avierta. Esto lo topi un poko desgustozo i karaylan, un komporto ke no me plazyo. En supito aparesyo una persona grande i godra, un jandarma, i me demando permisyon de kontrolar mi chanta. Me se hue la riza, i perlas de sudor aparesyeron en mi kara. | Me estava muryendo del espanto. Esta persona, ke teniya grandes dedos
en guantes blankos, i muncha eksperyensya, metyo la mano en el
karishiklik de la chanta, toko i apanyo la domatika, i después de
anunsyarme ke la estava sekuestrando, la metyo sovre el guante blanko de
su mano i se hue… Kualo afito ? Ke kelipur syego topo ? No avia lugar para demandas. En este momento vide ke la eskriturya sovre la etiketa del perro era: “en servisyo de la agrikultura”. Entendi ke el perro era empleado para kontrolar la agrikultura amerikana i para prevenir la importasyon de produktos defendidos. Nunka supe si las frutas de muestra planta de domates les gustaron a los Amerikanos. |
 | |
|
|