Musique : Komo Nasio el muevo disko de coplas sefardies de Alberto Hemsi - Allegra Hemsi-Bennoun

Notre chronique musique est consacrée à Alberto Hemsi à l’occasion de la sortie du disque “Coplas Sefardies” Collection Patrimoine Musicaux des Juifs de France de la Fondation du Judaïsme Français. Voir également  les numéros LS 45 et LS 46 où nous avions évoqué, A. Hemsi.
Antes de todo kero rengrasyar la “Fondasyon del Judaismo franses” i sovre todo el sinyor Hervé Roten kon el kual lavori injunto kon muntcha emosion i amor, porke era un dezeo muy grande ke yo teniya de muntcho tiempo. Todo es fina ke viene a ora del Dio ! Ansi fue, ke mi dezeo de poder azer algo para rebivir la memoria de mi padre se izo de letche i de miel. Ma yo siempre perkurava de avlar de el en aziendo konferensias i konsertos de sus ovras. Es ansina ke un diya supe ke aviya en Paris konsertos de musika djudeo-espanyola i yo pensi a ofreser a la persona ke iva kantar una seriya de los dies kuadernos de las “Coplas sefardies” de mi padre. En franses esto se dize ke es etchar un bokal a la mar (une bouteille à la mer contenant un message) en esperando ke puede ser salyera koza interesante de este djesto. Ma la boveda me pujo i no meti un biervesiko para akompanyar los kuadernos, i es ansi ke no tuve dinguna notisya ! Ansi pasaron 15 anyos i yo me aviya ulvidado kuando, en supito el anyo pasado resivi una letrika de esta persona dizyendome ke perkuro muntcho para toparme. Finalmente avlando kon una persona ke me konosiya, pudo eskirvirme para dezirme el karar ke esta musika le agrado i ke se metio a studiarla kon muntcho amor i plazer i ke deseava azer un disko de estas ovras.

En meldando esta letra stuve tanto kontenta ke le respondi ke si teniya de menester de algo sovre la musika de Hemsi estava dispuesta de ayudarlo. Ansi se empeso este lavoro tan presiozo en mizmo tiempo en sintiendo la emisyon djudiya el alhad demanyana a la televizyon, supe ke aviya una fondasyon djudiya franseza ke arekoje las ovras de kompositores djudiyos ke bivieron en Fransia. Ansi es ke me permeti de telefonar a esta fondasyon i me presenti. A la persona ke me respondio le demandi ke keriya si era posivle tener un rendez-vous kon un responsavle. Es ansi ke tuve el plazer de konoser el sinyor H. Roten ke es el direktor artistiko. Ansina es ke empeso la storia de este disko.

I poko tiempo despues el kantador ke se yama Pedro Aledo me telefono para dizirme ke teniya de vinir a Paris i ke keriya konoserme (el mora en Marsilya). I kuando vino a verme me trucho saludos del sinyor Roten (porke antes de vinir teniya un rendez vous kon el). Yo me kedi enkantada de esta koensidensia ! i sin saverlo era konosida de los dos en mizmo tiempo, i me dio a entender ke vino para ver si pudiya azer un disko kon las ovras de mi padre grasias a la fondasion i al sinyor Roten, i de ayi se empeso a konkretisar el projekto de este disko ke salio al presipio del anyo.

Kuando me lo ofresio este disko el sinyor Roten en vyendo la “pochette” del disko fue la grande djoya para mi kon muntcha emosion ke lo senti. Teniya lagrimas ke me estavan kayendo.

Kare vos diga kel el signor Aledo es un perfeksionista i tiene una vos maraviyosa, kaiyente i muy sensible. El kanta kon muntcho sentimiento y amor (el me dicho ke esta enamorado de esta musika!).

Otra kosa muy importante es ke tiene una prononsiason muy klara del djudeo-espagnol en su manera de kantarlas. Se puede dizir esta musika tan ermosa para oyirla ma muy dificil para kantarla i akompanyarla al piano. Tambien el pianista el Signor A Selmi es maraviyoso ! Se puede dezir kon muntcha modestia ke este disko va tener una grande reuchita, i se lo rogo de todo mi corason.




Agora kero dizirvos unas kuentas palavras sovre” las coplas sefardies” ke arekojo mi padre. La idea le vino kuando abolto despues de aver pasado siete agnios en Italia entre guerra i studios musicales, el fue resivido kon muntcha alegriya por toda la famiya i kon kantes para dar lores al Dio ke avolto vivo i sano. Y da kel tiempo le vino la idea d’arekojer estas kantigas i romansas” para ke no se pedrieran. Esto fue ke empeso a poko a poko a demandar a su bava de kantarle todas las kantigas i romansas ke konosiya i el estuvo eskriviendolas i esto fue el impesijo de esta grande ovra ke yamo “coplas sefardies”. Kreygo ke mi padre fue un” visionnaire” i por esto gracias a el estos kantes kedaron eskritos. Este muevo disko kreygo ke va arebolver muntchos rikuerdos akeyos ke lo van a oyir i pensaran a sus tchikes en akodrandosen de las personas aedadas ke kantavan estas romansas en sus famiyas.

En mismo tiempo ke komposo la musika de estos kantes en Alexandria el kontinuo a arekojer tambien todos los kantes religiosos ke se kantavan en la kiyla grande Eliaou Hanavi el mismo buto para ke kedaran para siempre eskritos.

Las “Coplas Sefardies” fueron eskritas i imprimadas en dos vezes los sinkos primieros kuardernos en Egipto i los sinko otros (10 en todo) en Francia. Ma el dezeo ke teniya era de kontinuar esta koleksion kon el resto de melodias ke decho sin akompanyamentos musicales.

Malorosamente el tiempo le falto i kedo una ovra manoskrita ke decho despues de su muerte. Ma las sirkonstensias de la vida me metieron en el korason de azer algo por su memoria. A l’okazyon d’un viaje en Israel me vino la ida de vijitar l’universita de Yeruchalaim sin tener una razon partikular. En kaminando en las uertas i mirando los edifisios me apersivi ke aviya fletchas mostrando las diferentes direksiones para ke la gente ke keriya vigitar l’universita supieran lo ke estavan buskhando ; Es ansi ke meldi ande se tovaba el departamento de musika djudeo-espagnola. Pichin le dicho a mi marido : yo kero bushkar a ver alguna persona para saver si puedo azer algo kon esta ovra postuma de mi padre. Entri komo se dise kon el pie deretcho para ke esta entrada me seya ugurliya (como dezia mi bava) Fue una koza muy emosionante para mi porké la primera puerta ke aharvi, tupi una signora ke estava skriviendo a la makina me demando ken es ke yo stava buchkando ? Kuando me presenti y kual era el buto de mi vigita estava mui sorpresa de tener enfrente de eya la ija del compositor A H. Y porké ? le diche, me respondio ke estava aziendo un kalendario de todos los artistas djudios del siglo XX i akel momento estava skriviendo el nombre de mi padre ! Ke koensidensia !! Es ansina ke se empeso la estoria de este manuskrito, Pichin me dicho ke por sigura su direktora iva ser muy interesado i ke keria verme. La cosa se paso muy presto ; de buelta al hotel ya me aviva telefonado demando ke keriya ver el msimo diya !
Ansi fué kemos vimos i eya se metio en contakto kon el direktor del departamento de musika djudeo sefaradia (el signor Serussi) y de akel momento el se amostro muy interesado i el projekto de imprimarlo empeso. Es un “cansionero” muy interesante i muy bien presentado ke sierve de dokumentasion para todos akeiyos ke se interesan a este folklore o a estudiantes ke keren azer uan tesis sovre el. Por mi parte este livro fue una grande satisfaksion porke fue realizado sin saver ke mi padre lo deseava. Lo supé en aboltando a Paris i en bushkando en su biblioteka el manuskrito i azer fotocopias para mandarlo a Yeruchalaiym, topi un papeliko entre las ojasescritas de su mano su deseo ke un diya puede-se ke en Israel van a imprimarlo ! Ya imaginash mi emosion de meldar estas palavras i ke yo lo ize sin saverlo.

Todo es fina ke viene la ora del Dio i tener siempre aftaha ke un diya o l’otro se puede azer todo kolay i liviano !

Para konkluir keria dizir a mi kerido padre dos biervizikos : mi kerido padre no se koimo ringrasiarte de aver arekojido este tresoro inestimable i es por esto ke me permiti despues de tu muerte de azer todo lo ke puedo para que non se pierdra ni tu nombre ni tus ovras porke lo mereses ; lavorastes toda tu vida para dechar para la posteridad estos tresoros, dea folklorikos o mismo kantes religiosos…

Te rengrasio muntcho de muevo i espero kontinuar a okuparme de tus ovras tanto ke esto biva i yo rogo al Dio ke tu alma repose en pas Amen ! y te digo ke estas siempre presente en muestra memoria.

Allegra Hemsi Bennoun
Comments