El Kantoniko de Chochana - Chochana Lucie-Mazaltove



El Kreador, benditcho El i benditcho Su Nombre, kuando formo el ombre,
lo izo kon tanta minusiya i metodiya, ke no me arto
de maraviyarme de tanta perfeksyon. Soltanto la kavesa ke parese komo un kuti byen aserado yeno de kantonikos ande estan guadradas todas las oras de muestra vida. Uno de eyos, el mas sekreto, es el ke
kontyene muestra memorya. 

Es de eya ke te kero avlar. Ya esto vyendo ke te estas demandando de kualo mas mos va intchir el meoyo.  De un livro ke meldo en manseves i ke topo muy interesante ? De una ovra artistika muy alavada ? De teatro o de un filmo de sinema ke aziya korer los spektatores para no mankar un evenemento muy apresyado del
publiko ? 

Jurnaliko pacha estas yerado. Lo ke salyo del fondo de mi memorya es una… kantiga. Nada mas ke una kantiga ! Tanta bovika ke
te la vo kantar. 

Mis ermanos, kon mi ermano bohor, la kantavan kuando suviyamos kon mi ermana las eskaleras para entrar en kaza, soltanto a la notche ke era eskura (no aviya muntcha luz en estas famozas eskaleras). Asentate, soltanto no te burles i oyeme. 

No te la vo kantar ke una sola vez. 

Na la kantiga ke mos aziya temblar kuando eramos tchikas.
Ah ! Ke ermozo bayle ke baylan los  ratones se suven en un palo, baylan por los kantones pich ! pich ! Ya van dizyendo sin saver lo ke es parese ke van
avlando la lingua del kinez. Salyo un marmeruso kon la kola amariya
despues salyo un Ruso para baylar kuadrilya.

No espantes ija miya ke es un raton manyana mos adova la kaza el patron. 

Barminam ! Barminam !

Del espanto ke se tomo, le salyo un kumbit a la punta de la nariz, un yara debacho el karkanyal, un postema detras de la oreja. Yamaron medikos savyos inkamboureados. Khan Yako sado ambezo por melezina, el moko de trenta i un lokos ! El mal ke teniya le pujo !

Dime, riyites un poko ? Ya saves ke se una mujer ! 

Es konosido, las mujeres se espantan de los ratones !


Chochana Lucie Mazaltove

Comments