El tio Salamon

- Tia, parese ke pishates i vinites de Estambol. Deké aboltates tan presto?

- Hanuma, en una semana ke estuvé ayí, izo luvya, inyeve i zelzelé.¹

Estambol estava muncho mas yelada de Inglatyerra. Aboltí para ver kara de sol, i luz de bivos.

- Ke haber² del tío Salamon?

- Un mes antes, el tío viajó a Espanya por primera vez en su vida.

- I komo se entendyó kon los Espanyoles?

- En Espanyol, ama kuando avryó la boka, no le demandaron de ke payís vyene, sino le demandaron de ke sieklo vyene.

- I ke disho el tio?

- Ya te imajinas, hanuma, el tio se aravyó muncho. El kreye ke dayinda es manseviko, i los Espanyoles lo izyeron un nikochíri³ de 500 anyos.

El aeropuerto de Estambol

- Tia, kontame komo es el aeropuerto muevo de Estambol.

- Si lo ves, ijika, te vaz a tresalir. Este modo de lukso no se tiene visto ni en el palasyo de los sultanes. Embasho está todo de mermer⁵ blanko, i limpio jáspe para lamber. Kuando aboltí al aeropuerto de Londra, me se vido un poko kitipyóz.⁶ Al tyempo, era todo lo kontraryo : el de Londra era mas ermozo.

- I mas kualo ay en el aeropuerto de Estambol?

- Izyeron un bazar tan luzyo ke me dyó ganas de merkar todo… fina ke vide los presyos.

- Ya entendí, tia, la merkansya era a la turka, i los presyos eran a la franka…

---

Si keresh meldar mas i mas en lingua muestra, abonavos a:

Aki Yerushalayim

POB 8075 - Jérusalem 91080 - Israël
Fax 972 57 90 386 - judeospa@trendline.co.il

---

Los arvoles de Estambol

- Tia, te huites a ver los muestros en los sementeryos de Estambol?

- Siguro, vide toda la mishpahá. Antes, kuando iva a Estambol, aziya munchas vijitas en las kazas. Todos me aresiviyan ensima de la kavesa, kon boyos, borrekas, tavlá de dulse kon kucharika de plata, i kaviko turko.

- Agora, komo son las vijitas?

- Hanuma, no es kolay tener 90 anyos. Agora, kaji todos los de mi jenerasyón estan en Ganedem. Las vijitas se azen en el betahayim.⁴

- Komo se topan los betahayimes?

- Muy kolay, ijika. En Estambol estan fraguando kazas de betón por todas las partes. La sola vedrura ke kedó está en los sementeryos. Kuando vites un arvolé, ya saves ke estas en el sementeryo. Demos lores al Sinyor del mundo, ke si no avían sementeryos en Estambol, no iva kedar ni un solo arvolé en pies.

- Mizmo los papupadres ke estan debasho de tierra son muy marafetlis : estan ayudando a konservar la natura.

Pesah en Estambol

- Tia, justo eskojites la semana de Pesah para ir a Estambol, i me deshates aki sola i seka.

- Atyo, guay de mi, no pudites komer la komidikas de Pesah muestras.

- Si, tia, ya me eskarinyí del gató7 de muezes, del sharope, del masapan i de los bimuelos.

- Mira, ijika, te trushe sharope de portakal8 ke te regaló tu amiga, sana ke esté. Ya supo ke te iva pasar muy makbul.

- Ya me tresalí de ver el sharope. Kóntame lo ke izitej noche de Pesah.

- Vino el hahamiko i kantó la hagada entera en ebreo. Yo no entendí ni una palavra. Lo solo ke entendí, es “boré perí me lo komí”.

- Ke ermozo, tiya, el Pesah de los Lehlis de akí tiene muncha relijyón i poka komida, el Pesah muestro tiene poka relijyón i muncha komida…

Renée Martin
reneemartin@beeb.net