Muestra Lingua : Las de Sulutcha

Le succès rencontré par le récit des conversations entre Sulutcha et sa tante d’Estambol en visite au Pays de Galles incite Renée Martin à poursuivre ces bavardages : lisez plutôt !


La tia de Sulutcha i los mundises1

- Sulutcha, kedi muy kurioza, kualo azes diya entero en el echo ?

- Ya no te dishe ke so mundisa ?

- Si, ama no esto entendyendo bueno. Tu kolega John esta kemadiko bueno del sol, i tu estas dayinda blankucha.Todos los dos soj mundises en la mizma firma, no azej el mizmo echo ?

- No, tia, ay mundis i mundis. Kada uno tyene su spesyalizasyon. John se sta okupando de reabilitasyon de terrenos kontaminados. Yo esto azyendo modelizasyon de volumenes de trafiko. El es mundis jeotekniko, i yo so mundis de transportes.

- Hanuma, yo no entyendo estas kozas teknikas. Kale ke me lo eskudyes kon la kucharika en la boka.

- Te eksplikare, tia. John surveya los ovreros ke vazyan burakos i inchen burakos en los shantiyes de konstruksyon. El lavora afuera todo el dia i por modo de esto esta bronzado. Yo lavoro dia entero en el buro delantre de la komputadora, i solo salgo para ver klientes en otros buros.

- Agora entendi. A John le pagan para ke tome banyos de sol dia entero, i a ti te pagan para ke djuges kon komputadoras. Esto es lavoro de mundis !

La tia de Sulutcha i los trenos inglezes
(IIe partie)2

- Sulucha, en estos tiempos estas viajando muncho. Ya te izites sorretera de kayes. Ande estuvites esta ves ?

- Ande peryimos la alguja: en Londra.

- I ya parese ke tomates el treno de muevo. Kontame kualo izites.

- Uvo un tiempo en ke se permitiya uzar telefónes de aldikera en los trenos inglezes. La djente avlava, no kon el vizino de al lado, ama kon los paryentes, kon los amigos, kon el avokato etc. Se oyiya dedikodus, sekretos profesyonales, pletos de famiya, todo lo ke keres ! Era mijor ke ir al sinema.

- I agora kualo afito ? Se izyeron todos mudos ?

- Agora los telefónes de aldikera se izyeron yasak3. Los Inglezes no avren boka, i estan kayadikos komo antes.

- Atyo, i kualo se oye en estos trenos ? No ay hitch4 bruido ?

- Si, no te merekiyes. Los turistos etranjeros no estan al koryente de la regla mueva. Agora se oye Wolfgang ke avla en Alman, Brigitte en Franses, Mehrdad en Farsi, Wenping en Chinezo. Parese ke no kedo ni
golor de Inglez en este pais !


La tia de Sulutcha  i el Noel judyó

- Sulutcha, los Inglezes tyenen el tino en una koza sola: Noel. Penan i lazran anyo entero para ekonomizar dos groshes, i dospues, se lo gastan todo enduna kuando vyene Noel.

- Si, tia, este es el uzo de este payis. I no solo el uzo de los Kristyanos. Mira, en el salon de los Koanim ay un arvolé de Noel.

- Atyo ke me muera yo, trokaron de relijyon ?

- No, tiya, merkan un pino i dizen ke es para Hanuka.

- Ya me apersiví ke los Goldstein komyeron indyana el 25 de Disyembre.

- I eyos dizen ke es indyana de Hanuka.

- I los Brucker te trusheron un regalo ermozo de Noel.

- No de Noel, tia, de Hanuka. I si tu no les das regalo, se aravyan. De una parte dizen ke son Judyos i ke no kreen en Noel, i de otra parte se aravyan si no les mandas regalos i kartikas.

- Ayde, Sulutcha, no tengas muncho daryaver kon esta djente, a si bivas tu. Ya parese ke estos Judyos se izyeron Kristyanos. Para no averguensarse delantre de los amigos trokaron el nombre de Noel i lo yaman Hanuka. A ken estan enganyando ?

- Tia, no te estrecheyes, se estan enganyando de si para si.

Renée Martin • reneemartin@beeb.net

Comments