Muestra Lingua : El Kantoniko de Chochana


Jurnaliko amigo
El papu i la nona estan al salon, el papu djuga pyano 
i la nona bayla 
charleston ! No, no te espantes, tengo toda mi kavesa ! 
No te afito, a ti, de tener una kantiga al tino i kantarla ?
Dize la verda, no riytes un poko ? 
En estos tyempos tristes, no aze mal. Agora seamos seryos. Te aprometi de kontarte komo 
se pasava un kazamyento muzulmano ay agora setenta anyos. Se empesava kon el diya del “katbe el ketab”, 
el ke se sinyava el kontrakto i el mansevo dava la dota. 
El novyo i la novya no se konosiyan. Este diya, el “maazun”, un ombre de ley veniya, aresevido por los ombres de 
la famiya. En otra kamareta se topavan las mujeres 
kon la novya vistida de blanko sin un enyudo endriva de eya, los piezes en una tchanaka yena de agua i yervas, kon un Koran 
endriva de la kavesa. Por tres vezes veniya un paryente demandarle ken va sinyar su kontrakto de kazamyento. Kuando ya dicho por tres vezes el mizmo nombre, alora ya estava kazada. El diya se pasava kon kantes 
i bayles. 

Malgrado todo, el novyo i la novya no se viyan 
i kada uno tornava en su famiya. Despues de unos kuantos diyas era la “dokhla”, la unyon del marido i de la mujer. Preparavan 
la novya tres diyas antes. Era el lavoro de la “machta”, una - diremos - “esthéticienne”. Empesava por azerle una 
epilasyon total. 
El segundo diya era la “henna” : la novya i todas la ijas de la famiya i las amigas les desinava kon la henna flores o pacharos sovre las manos i los pyezes. Mi ermanika i yo moz aziya solamento una flor endriva de las manos. El diya de la “dokhla” era un diya grande.
 La kaza de la novya se intchiya de mujeres ke entravan kon grandes 
“lagalits”, youyous de alegriya.
La novya, vistida 
de blanko estava asentada en una estrada. Al lado de eya, dos ijas vestidas de blanko tambyen. La novya se va 
trokar tres vezes de vistido, uno blanko, uno blu i uno roze para aresivir el novyo, todo esto kon kantes i bayles  de la “almas”, grupo de muzikantes todas mujeres. El komer de este diya era el kuskus etcho kon manteka, asukar 
i fruta seka.
I el novyo en todo esto ? El se paseava kon los amigos i paryentes en 
karoza. Se kedavan en kada kavane onde los aresiviyan kon shorbet de almendra i muzika. A la notche todos veniyan a la kaza de la novya. A la puerta aviya un grande “chader” (tente) kon muzika i yeno de ombres. La ora la mas importante era akeya de la “zafa”, la enkontra del novyo i de la novya. La novya kon las mujeres i el novyo kon los ombres 
formando una 
prosesyon. Despues, novyo i novya kon las baylades a delantre, akompanyados de todos, kada mujer una kandela asendida asta la kamareta 
de los novyos.
Imajina, jurnaliko, la alegriya o la 
deziluzyon de estos mansevos : era un kazamyento entre dos famiyas i eyos no teniyan nada de dizir !
                               
 Chochana-Lucie Mazaltove
Comments