Muestra lingua : Las de Sulutcha

Le succès rencontré par le récit des conversations entre Sulutcha et sa tante d’Estambol en visite au Pays de Galles incite Renée Martin à poursuivre ces bavardages : lisez plutôt!

La tia de Sulutcha 
i las famiyas modernas

- Sulutcha, tu vizina tiene dos ijikos, ama es kuriozo ke no se asemejan ni al padre ni a la madre.

- Si tia, el primero es del marido, i el sigundo es da la mujer. Agora van a tener otra kreatura endjuntos.

- Ke maraviya, kada ijo vino de otra boda. Bueno, ande estan las famiyas normales, kon ijos de mizmo padre i madre?

- Ya parese ke no kedaron famiyas normales. Agora la djente se kaza i se kita kada punto i ora.

- Ya entendi deke lo azen. Es bueno para la ekonomia. Sino komo van a ganar los avokatos, los kurtyes i los hahamikos ?


La tia de Sulutcha

i las fiestas

- Ande te estas indo, Sulutcha? Ya te vistites i te izites muy luzya. No seya ke te estas indo a una boda?

- No, tia, me esto indo a una fiesta de divorsyo.

- Afuera las karas, leshos de mozotros ! En mi tiempo la djente no divorsyava. I si afitava una vez en mil anyos, no se diziya nada a dingunos. Era verguenza.

- No te estrecheyes tiya, oy en dia ay tantos divorsyos komo bodas, i a la djente le plaze englenearse. Kada preteksto es bueno para azer una fiesta. Si no es boda es divorsyo, si no es divorsyo es boda.


La tia de Sulutcha

i el bahchavan

- Sulutcha, deke estas yorando?

- No demandes, mi bahchavan se murio. Era un ombre bendicho, i me aziya una uerta tan ermoza ke todos los vizinos se selavan de mi.

- Atyo, kuando afito esto?

- La semana pasada lo enterraron kon muncha merasim. La famiya no era relijioza, ama lo izyeron para dar a ganar dos groshes al papaziko.

- I agora, ken se esta okupando de la uerta?

- No demandes, topi un muevo bahchavan, una kreatura de vente anyos ke dayinda no se save atar los chukures. Me aze un hayre i mil danyos.

- El Dyo ke lo aga bahchavan! Ayde, no te estrecheyes, a si bivas tu. Ya vamos a topar remedio. Ande mozotros se dize ke kuando oskurese, es para amaneser !


La tia de Sulutcha

i el marido virtual

- Tia, la ija de Marikula ya topo novyo i se esta kazando.

- Ayde, mazaloza i venturoza ke seya. Ande topo novyo ? Se fueron ande la kazamentera ?

- Si, se puede dizir ke se fueron ande la kazamentera virtual.

- Ke me estas dizyendo, ijika? Ke marafet muevo es esto?

- Mira, te amostrare. Asyendes el komputer, pizas a estos botonikos, i topas una firma de kazamenteras. La firma te da la lista de los mansevikos ke estan bushkando novya.

- Sulutcha, yo no entiendo estas kozas de komputers. Dizeme una koza : si se puede kazar kon marido virtual, se pueden tener ijos virtuales tambien ? I demandale a tu komputer si puede kortar la fashadura de las kreaturas !

reneemartin@beeb.net

Comments