Muestra lingua : Las de Sulutcha

Le succès rencontré par le récit des conversations entre Sulutcha et sa tante d’Estambol en visite au Pays de Galles incite Renée Martin à poursuivre la série : lisez plutôt !
La tia de Sulutcha 
i las suegras

- Tia, mi amiga esta travando las mako de paro kon su suegra.

- Atyo, guay de mi, kualo esta afitando?

- No demandes. Esta suegra topa de avlar de la moshka ke bola. Todo lo ke aze mi amiga es negro. Ya le kito las grenyas, i la esta kitando de la chile.

- Sulutcha, te dare un konsejo de nikochera. Kuando keres kazarte, no bushkes marido. En primero bushka una suegra, i eskoje una buena. Si te plazyo la madre, kazate kon el ijo.



La tia de Sulutcha 
i los trenos inglezes

- Tia, ande estuvites oy dia entero?

- Oy ize ida i vinida a Londra en treno.Una koza me paresyo muy kurioza. El treno estava yeno de djente i todos estavan avlando.

- I deke ke no avlen? Si boka tienen, es para avlar.

- Hanuma, al tiempo no era ansina en este payis. Kuando yo vine vente anyos antes, los trenos yine estavan yenos, ama todos tenian la boka serrada. Kada uno i uno meldava su gazeta u su livro kon kayades.

- Ya tienes razon, tia. Aki los ajenos no avlan los unos kon los otros.

- Solo kuando me asenti en el treno me rendi kuento de lo ke estava afitando. Todos estavan avlando kon sus telefones de aldikera. No estavan avlando kon sus vizinos, estavan avlando de si para si!

-Ya tienes razon, tia. Los Inglezes no trokaron, solo troko la teknolojia.



La tia de Sulutcha 
i el piano

- Tia, oy parese ke huites de vijita?

- Si, me envitaron a la kaza de un vizino ke save tanyer el piano de maraviya.

- I kualo djugo en el piano?

- Todo lo ke kijimos, muzika a la franka i muzika a la turka. Bach, Chopin, Mozart etc.

- I ke muzika a la turka vos djugo?

- Una muzika de Ketel Bey. Parese ke es un kompozitor turko. Eskrivyo muzika sovre los bazares de Persia, sovre Ejipto, i muncho mas.

- Agora me akodri ken es este kompozitor. El no es ni turko, ni un Bey. El es ingles. Se yama Albert Ketelbey i nasyo en Birmingham en el siklo diez i mueve. Eskrivyo muzika ke para los Inglezes era oriental i egzotika en akeyos tiempos.

- I a mi me paresyo ke era turko!

Renée Martin

Comments