La tia de Sulutcha se izo asasina

- Tia, ke esta afitando? Mi marido se esta muryendo del sar¹. Disho ke keres matar a alguno.

- Ken, yo? Dande parande? Yo en mi vida no ize danyo ni a una pluma. Te dizere lo ke afito. Tu marido i yo estavamos mirando la televizyon, i el program no mos plazyo del todo.  Tu marido me disho: “kere apagar, tia?”  Yo pensi de mi para mi, “deke me esta demandando esto? Yo no tengo devdas para pagar”.  Le dishe: “no”. I dospues le dishe: “amata, amata”. Esto ke oyo tu marido, se espanto, i se hue koryendo ande ti.

- Agora esto entendyendo: “apagar” en espanyol moderno kere dizir “amatar” en la lingua muestra.

- Dizele a tu marido ke se ambeze el espanyol halis, si no, no mos vamos a entender ni en mil anyos.

La tia de Sulutcha i la lingua muestra

- Sulucha, beth ydy’ch gwaith chi?

- Ke dishites, tia?

- Ble dych chi’n gweithio?

- Atyo ke me muera yo, la tia no esta en si. Yamaremos pishin al doktor.

- Sulucha, no te merekiyes, yo esto muy sezuda. Tu sos la inyorante ke no me estas entendiyendo. Te esto avlando en gallés.

- En gallés? I dande te vino este gallés?

- Kuando tu te vas al echo, yo salgo a kaminar en el park. Aya konosi a un nikochiri bivdo gallés ke kamina kada dia kon su perro. Un dia empesimos a avlar: yo le dishe ke avlo judyo, i el me disho ke avla gallés. El se kesho ke su lingua se esta muryendo, i yo le dishe ke la mia esta agonizando.

- I komo se yama este Monsieur?

- Se yama Mr Williams, i el perro se yama Porky.

- Atyo, ke mal mos kere, es un perro trefa!

- Deshame ke te diga lo ke estamos azyendo: Mr Williams me esta ambezando el gallés i yo le esto ambezando la lingua muestra. Ansina tenemos una persona mas para ajustar a las statistikes de los ke avlan estas linguas.

- No una, dos.

- Komo dos?

- Mr Williams uno, i su perro dos!

La tia de Sulutcha pisho en Fransya i abolto

- Sulucha, ya hui i vine a Fransya en un puntiko. Bendichos los enjenyeros ke fraguaron el tunel debasho de la Manche. Estuve dos dias kon mi amiga Diamante ke no avia visto desde ke eramos chikitikas.

- Dizeme lo ke izites en Fransya. Avlates en Franses?

- Parese ke la lingua de Molière no es komo me la ambezaron en las eskolas de la Alliance de Estambol.

- Deke, ke afito?

- Te kontare, hanumika. Una noche keriamos azer karne asada en la huerta, al bodre de la mar. No avia muncha luz, i mos metimos en kamino en lo lusko i en lo brusko. La kaye estava vazia: no aviya ni moshkas. Bushkimos i bushkimos, i a la fin topimos a la papasyega un kasap avyerto. En el magazen aviya i karne para asar, i kimuriko² para el mangal³.  Le dishe al kasap: dame un poko de “charbon”. El me disho: kuantas revanadas kere, Madame?  Yo pensi: karvon en revanadas? Dande salyo esta moda mueva? Le dishe: kero un sako de “charbon”, i no en revanadas. Alora el kasap entendyo i me disho: Ekskuzame, Madame. Eya disho “charbon”, i yo entendi “jambon”.

- Si me vo otra vez a Fransya me va kedar boka kayada, no va dizir ni pi. No kero ke me entyendan gato por pato.

La tia de Sulutcha i los haberes de Estambol.

- Sulucha, esta televizyon por satelit ke tenej aki es koza grande. Ya me paso muy makpul⁴. Ayde, mete los haberes de TRT⁵ para ver lo ke esta afitando en el mundo.

- Los grevistos fransezos estan protestando en las kayes; miles de personas kedaron sin kaza en la China por modo del tornado; las matansinas estan kontinuando en Irlanda del Nord: el presyo del simit⁶ suvyo.

- Atyo, no me digas! Kuando vine de Estambol el simit kostava 100000 liras.  I agora kuanto es?

- Ya suvyo a 150000.

- Este es el haber mas negro del dia. Kuando yo era chikitika, un simit era vente paras.

- I kuanto valia una para?

- Te eksplikare, hanuma. Tu dayinda sos manseva i no saves estas kozas. Kuarenta paras era un grosh, i sien groshes eran una lira. Oy en dia se kere kaji un milyon de liras para merkar una Sterlina.

- Esto se yama enflasyon.

- El Dio ke se les venge de los ke trusheron la enflasyon i suvyeron el presyo del simit!

Renée Martin