El Kantoniko de Chochana, Jurnaliko amigo - Chochana Lucie Mazaltove


Ay oras en la vida ande el benadam se demanda ke remedio topar para salir de su gezirah. Portanto en vezes no es tanto grave ke el pensa. Syempre ay situasyones mas dabeter.

Para darmos un egsempyo mi madre mos konto la vida de un padre de famiya ke no 
puediya mas de gareyar.

Jurnaliko ! Deshame te la kontare.

Este buen djudiyo bivya en un kazaliko. Tenya un pedazo de tereno en el kual frao una kazetika para su mujer i sus kuatro kriyaturas. La vida era terivle… no aviya muntcho lugar. 

El no ganava abastante para pueder engrandeserla. Estavan los unos endriva de los otros. Diya entero eran gritos de la madre i gritos de los tchikos. 





Desesperado, el buen ombre se fue a ver el haham, ke le tope una solusyon. 

El haham, ke era muy santo, le demando de azer entrar las tres gaynikas ke tenyan, en kaza por una semana i de atornar a verlo despues. 

Te imajinas komo estava el meoyo de este ombre de ver los ninyos koryendo detras de las gaynikas ! Tres diyas despues atorno ande el haham i le disho ke todo estava mas negro. El haham le konsejo de meter la kavretika ke tenya, al lado de las gaynikas, en kaza.

Esto fue la alegriya de los tchikos que puediyan azer mas lokuras…

Los paryentes no dizyan nada por modo ke era el konsejo del haham ! Para eyos, era un konsejo djusto ! Kuando la situasyon se agravo, muestro buen padre se atorno ande el ombre santo kontarle lo ke estava suportando. 

El haham le disho “yo se ke tyenes mas un azniko : 
aze lo entrar kon vozotros. Esto alora le izo konoser kualo es guerkinam.

Al otro diya a la madrugada el buen djudyo estava a 
la puerta del haham, yorando 
de nyervos. Kuando el haham  vido en ke hal estava, le konsejo de salir el azniko de la kaza. Al otro diya, el mizmo se fue a dizirle de salir tambyen la kavretika. 

El povre ombre empeso a respirar mijor. Al treser diya son la gayinikas ke atornaron a su lugar. Ansi fue el grande diya  para todos.

Moralidad :
La kaza kedo estretcha, ma por eyos ke pasaron diyas de lokura, era un palasyo grande i ermozo.

Ansina es ke supyeron ke syempre ay mas dabeter.

Chochana Lucie Mazaltove
Comments