El Kantoniko de Chochana, jurnaliko amigo - Chochana Lucie-Mazaltove


En estos diyas, se avla muntcho de Djoha. Kije saver ken es este famozo personaje. La repuesta no me do satisfaksyon. La sola koza ke me akodro es ke kuando era tchika i uno de mis ermanos me tratava de Djoha, yo me metiya a yorar pensando ke se stava burlando de mi. Kuando me ize mas grande, remarki ke kuando una madre presentava un muevo nasido, le diziyan “Ayde! ayde! Tapalo, ya sta la ermozura de Djoha !” Para ke no le den aynara ? porke ? Djoha no era ermozo ? Kuando una mutchatcha ni ermoza ni feya se dava importanza, le diziyan : “Ya stas komo la grasya de Djoha !” Porke ? Djoha no era grasyozo ? A una persona ke prometiya muntcho i no teniya palavra, le diziyan : “Si kere el Dyo, Djoha ya vino” Porke ? Djoha no era onesto ? Kuando diziyan “Ansi biva Djoha i venga en kaza”, era para dizir ke una persona no la viyan muntcho.

Todo esto no me dyo ni une repuesta a mis kestyones. Ke seya savyo, filozofo o de la buena parte, mos kedo a mosotros las konsejas de Djoha. Konosemos muntchas ke mos kontaron muestros paryentes. Ay para todo los gustos. Komo sos un djornal seryo topi una de eyas dando la prova ke Djoha no era bovo. Deshame te la kontar.
 
Un diya de vyernes Djoha se fue a la mechkita (dunke puede ser ke Djoha era muzulmano) para la orasyon de la medyo diya. Antes de entrar para enkorvarse, izo komo su ley lo rekomandava. Se kito las konduryas a la puerta. A la salida, disho shalom a todo sus konosidos i se fue a tomar atras sus konduryas. Bushka de aki, bushka de aya, konduryas no ay. Por el Dyo santo ! No se va ir deskalso en kaza ! Demanda a uno, demanda a otro dingunos las vido. El, de natura kalma, empeso a gritar : “El ke me las tomo, guay de el i guay de su alma ! por modo si no me las traye vo ser obligado de azer lo ke izo mi padre !” Todos los amigos i konosidos empesaron a buchkar kon el espanto de verlo azer lo ke izo su padre. Pasando las oras, el puevlo mas i mas tremblava de espanto. El ke las tomo, averguensado entero, se las trucho para salvar la situasyon i no tener de saver lo ke izo su padre, ke deviya ser terrivle. Kuando se aresentaron los meoyos i ke todo estava kalmo, Djoha kon alegriya grande se vistyo sus famozas konduryas. “Alora” le demandaron “kualo era lo ke izo tu padre ?” Alora Djoha, kon sus ayres de grandesa, los respondyo : “No ay ke una koza de azer en esta situasyon : es de merkar un par muevo…”

Chochana Lucie Mazaltove

Comments