El Kantoniko de Chochana, Jurnaliko amigo - Chochana Lucie Mazaltove


En estos diyas ande todas las buenas djudiyas se meten a alimpyar i a lustrar kada kantoniko de la kaza i a aresivir senyor Pesah kon todas las onores ke merese, el tino me se fue al tyempo ande yo era tchika i viya komo aziya mi madre. No es de esto ke te kero avlar.

Lo ke te kero dizir es ke al mismo tyempo de Pesah, en Alexandria, aviya un diya ande el puevlo selebrava la primavera. Lo yamavan este diya CHAM EL NASIM. Este diya las uertas y el bodre de la mar se intchiyan de famiyas ke profitavan para azer un “pique-nique”. Otros preferavan pasarlo en kaza i invitar paryentes i amigos. La tradisyon era de komer karne de kodrero asada. Es lo ke aziyan mis paryentes. 

Uno de estos anyos, teniyamos una syerva ke se yamava Roda. Komo viniya de un kazaliko ande aviya militaryos inglezes, tenya plazer a dizir ke eya saviya avlar ingles. Naturalmente, su avlar era tuerto. Por kada koza ke diziya, se topava la palavra IDIMIDI. Eskapimos entonses por yamarla Idimidi.


Kuando vino el diya de CHAM EL NASIM, mi madre, despues ke apronto todo el guizado, la kaza komo la novya i la meza pronta para aresivir los invitados, demando a Idimidi de kayentarle la agua para tomar banyo. Se kaliya tyempo, no era komo oy ande avres la fuente i la agua kayente esta pronta !

Entretanto, unos kuantos amigos empesaron a venir. Komo eran intimos, no aviya taklif !
Mi madre se asento kon eyos al salon. Arivo un momento, Idimidi avriyo la puerta, miro a mi madre, i le disho : “Lady, come on…” Mos mitimos todos a riyir. Despues le demandimos porke avlo ansina ?

Alora mos dyo una lisyon de “tact” i “savoir vivre”. 
Mos disho ke no era posivle delantre los invitados de dizirle “Senyora el banyo esta pronto !”

Chochana Lucie Mazaltove 

Comments