El Kantoniko de Chochana - Chochana-Lucie Mazaltove


Jurnaliko amigo

Dime la verdad : estas suportando este tyempo de friyo i nyeves ? Yo, no ! Sovre todo ke vengo de pasar un mez en Israel. Aya el sol es tanto djenerozo ke la djente no saven kualo azer para afreskarsen. No te vo kontar la ermozura del payiz. Otros lo saven dizir mijor de mi.

No era un viaje de turismo : yo no puedo avlar ke de la aresivida ke me izo la famiya. Todos, grandes y tchikos me amostraron una kerensya ke no puedo ulvidar, soltanto mi kunyada tan korajoza i su marido.

Malgrado sus dolores i sufryensas topa remedio de riyir i ayudar el ke tyene un problema.Tuve el mazal de asistir a la bar-mitzvah del nyeto de mi ermana. Figurate ke nasyo kon dos ermanikas. Los yaman chlechia (“triplets”). Te imajinas si la alegriya era grande ! Era todo kantar, komer i baylar. Si me viyas, no me iyas a konoser. Ya bayli a la evropea, a la turka, a la israelyana. Lo mijor era kuando bayli a la araba (no te ulvides ke yo so nasida de Alexandria !). Malgrado todos mis esforzos, no me topi un haver. Ni uno pudo tomar el lugar del ombre de mi vida. Me parese ke entyendes ke es una burla…

 

Jurnaliko haver, antes de decharte te vo kontar una konsejika, yo la topi muy savroza.

Es un buen judyo del Sentier, ke grasyas a su kapatchitad se izo riko. Nada le mankava : vestidos de luso, djoyas, auto, kaza grande, syervos.

Desido de ir “à la chasse” para azer komo la djente alta. Se merko un perro para akompanyarlo. Al primer golpo del tofek, d’espanto el perro se fuyo. Entonses le konsejaron de ambezarlo al ruido. Lo mityo en una sala ande kada notche se dava una fyesta : bar-mitvah, kazamyento, soltante henne. El ruido no mankava !

Despues de un mez, pensando ke era bastante, lo tomo otra vez al perro “à la chasse” .

Al primer golpo del tofek el perro se metyo a baylar i a azer “you-you-you-you-you-you” al modo de los “pieds-noirs”…

Chochana Lucie Mazaltove

Comments