Muestra lingua : Los Hasidim de la planeta Mars - Una konseja de Daniel Alcalay


Un dya de alhad, Shimon estava kaminando en la rue des Rosiers en Paris. Vido ke estava vinyendo verso el un hasid ke lo estava mirando. Lo miro y el tambien i rekonosiyo su amigo Mordehay.

“Bre Mordehay” le disho, “ke estas aziendo kon este vistido de karga1, komo vyene ke te vistes ansi, tu ke no metes el piye al kal, ke te afito ?”

“Te lo vo kontar, me afito una koza de no kreerla, ven, moz asentaremos en este kafe.”

“Este kafe no es kasher” disho Shimon...

“No importa, yo no so un hasid kasher !”

Se asentaron en la terasa del kafe; Mordehay le disho : “te estas akodrando ke me fui in Israël ay dos mezes ?”

 “Si ya me akodro, era el empesijo del mez de djunio.”

“Dunke en Israël kije vijitar el monte Nebo, ande se murio Moshe Rabenu.”

“Ma el monte Nebo se topa en la Jordaniya” le disho Shimon.

“Ya lo se, ma kon la paz ke izyeron Israël y la Jordaniya, puide irme fasylmente a Amann. Aya demandi a una agenciya de viyage si ay possibilida de vijitar el monte Nebo.”

“No kon grupo me disheron ma puedes alkilar una jeep y se keres, una tchika tenda para pasar la notche.”

“OK dishe”, alkili una jeep y una tenda y me fui al monte Nebo. Arivi la tadre, me ize a komer i despues me asenti en basho mirando el syelo. Kon el aver lympio del monte, las estreyas y la luna estavan briyando de un briyo ke no tengo visto de mi vida. En un subito vide una makina en el syelo ke se estava aserkando de la tierra sin azer bruido.

Pensi ke deve de ser una arma sekreta de los Israeliyanos ke esta aziendo manovras. La makina se aserko, se aserko y se pozo. Yo me estava espantando ma kuriozo tambyen de saver. Me alevanti y me fuy serka de la makina. Una puerta se avriyo y, de la makina, saliyeron sesh ombres vistidos komo los hasidim. Me aserki y vide ke teniyan barvas, ma la kolor de las karas eran vedres.

Me disheron : “Shalom, no mires la kolor de muestras karas, no semos hasidim teriyanos, ma marsiyanos, viniyendo de la planeta Mars.”

“Ma les dishe, los savios dizen ke no se puede bivir en Mars.”

“Los savios de la tyerra son ravanos” me respondiyeron. “No solo ay vida en Mars, y es yena de hasidim komo mozotros.”

“Vinich syempre en la tyerra ?” les dishe.

“No, es la primera vez, vinimos para saver si es posivle de azer vinir en Mars hasidim teriyanos. Si keres, puedes vinir y tu.”

“Deke non ?” dishe, “ma a kondisiyon ke pueda retornar en la tyerra kuando kero.”

“No problem !” me respondyeron en inglez. “Ma deves de vistirte komo los hasidim, de preto, de ariva fin abasho para ke puedemos rekonoserte.”

“Kon esto, “al vermos, shalom” me disheron, entraron en la makina y se fueron komo un relanpago. Kala la razon por la kuala esto vistido ansi. Bueno, agora kale ke me vaya, telefoname.”

Shimon kedo solo i no estava revinyendo de lo ke le afito a su amigo Mordehay.

Paso una semana, Shimon estava kuryoso de tener novedades y penso : “Me vo yirme a su kaza.”

Tchafteyo a la puerta y le avrio la madre de Mordehay, yorando.

“Ke pasa ?” demando Shimon, “esta hazino Mordehay, tuvo un aksidente ?”

“No, no”, respondyo la madre, “Mordehay se lo yevaron a la timarane2. Le konto a mi ermano el mediko, ke vido hasidim marsiyanos. Mi ermano penso ke saliyo loko y lo izo entrar en la timarane de St Maurice, kon kamiza de fuerza.” 

“Ma” respondio Shimon, “Mordehay no es loko, es tu ermano ke lo fuyo, todo lo ke me konto tu ijo es la verda. Vo yir a verlo, y lo vo liberar...” 

Siete de la demaniyana el telefon sono ande Shimon y lo esperto...

“Alo ken es ?” demando Shimon.

“Yo so Mordehay...”

“Mordehay, te liberaron, salites de la timarane ?”

“De kuala liberasyon, de kuala timarane estas avlando ?” le respondio Mordehay.

“Nada, nada, es un sonyo ke ize, te lo vo kontar otro diya. Bueno, para kualo me estas telefonando ?”

“Para dizirte ke no te olvides de vinir esta notche a komer a kaza.”

“Bueno, bueno” respondyo Shimon, y kolgo el telefon.

Y penso “este ijo d’un maredo de Mordehay no se va azer benadam ? Me esperto djusto en el momento ande iva saver komo biven los hasidim en la planeta Mars.”

Nunka no lo vo saver !

Daniel Alcalay
Comments