Muestra lingua : El Kantoniko de Chochana - Lucie-Chochana Mazaltove

Amigos de la Lettre Sépharade
Espero ke todos pasatesh una buena fiesta de Pesah, aunados al giro de la meza, kada uno i uno kon su famiya la notche del Seder para meldar la Haggada, para komer el haroset i dizir las tres kozas importantes ke son Pesah, Mazza i Maror. Las nekotcheras, malgrado la kanseria de los preparativos, apresiando el plazer de pueder kontentar a todos i ver a ken komera lo mas entre las keftes de puero o de spinaka, las minas i los bimuelos.

Ande mosotros senyor Pesah lo aresivimos kon todas las onores ke merese. Meldimos la Haggada un poko en espanyol, un poko en frances i mismo en arabo. Ma la mas grande parte es el balabay (mi marido) ke mos la kanto en el lashon hakodesh kon su boz ermosa (ke no me manke). Arogo ke tengash un buen enverano i ke seya para vosotros el Pesah a venir kada anyo mijorado en vida de todos.

Lucie-Chochana Mazaltove


Comments