Henriette Azen se souvient des mantekaos que lui préparait sa mère.


Son pasteles de orno muy sabrozos. yo los ago komo los azia mi kerida madre. Eya empleaba azeite i no manteka, de la palavra espanyola donde viene el nombre. Se azen muy fasilamente.

Ingredyentes : un kilo de arina, medyo litro de azeite, 350 gr. de asukar, un basiko a likor de ouzo o raki, i kanela en polvo, un poko de sal.

Preparasyon : en dyentro de un grande saladero o una basineta de plastik, poner el asukar, l’azeite i la likor. Mesklarlo todo byen. Anyadir la arina i mesklar todo en apretando kon las manos. Es una pasta “sablée” komo la arena diremos.

Tomar pedasikos de pasta, lo mas iguales posible i tornarlos entre las dos palmas de las manos para azer bolas, komo para las almondigas. Apretar un poko esas bolas de pasta i ponerlas sobre una plaka salpikada de arina. Kon los ingredyentes indikados se yenan dos plakas de mantekaos.


En primero ensender el orno unos dyes puntos. Salpikar los mantekaos kon la kanela en polvo. Se entran las plakas en el orno kayente. Abahar el fuego. Esos pasteles se kozen a fuego menudo.

Despues un kuarto de ora, kambiar las plakas : la de abaho se suve, la de ariba se pone abaho. Los mantekaos los abasta koser media ora en el orno. Deben kedarse klaros i no tomar kolor morena.

Kuando las plakas ya estan frias, se pueden poner los mantekaos en dyentro de una kaha de yerro. Se arsan kon la lama de un kotchiyo uno por uno delikatamente.

Entre kada napa de mantekaos se pone un papel “sufurisé” o una foja de alu para ke no se rumpen.

Al empesijo, si no se puede byen arsar la pasta, se puede anyadir un poko de agua pero no muntcho. A sigun la gordura de pasta arsada para azer las bolas, salen mas o menos de mantekaos.

Mis ihas los azen kada semana. Yenan solamente una plaka. Ponen los mantekaos sobre un plato de servisyo. En dos o tres dyas ya no kedan... Los ninyos se aregalan kon esos pasteles tan sabrozos, i los amigos tambyen !

Henriette Azen
Comments