Exemplaires : El kantoniko de Chochana - Amigos de la Lettre Sépharade


Kuando un benadam tiene sehora o bela, bushka una persona para avlarle y pueder desbafar. Yo, oy, kero desbafar, es de alegria. No es kon ti solo, jornaliko amigo ke me puedo konfiar. Tu lo vas a dizir a todos mis keridos ke te konosen.

En estos dias izimos sinkuenta anyos de kazados, “les noces dor” komo se dize aki.

Sinkuenta anyos es una vida... Komo kada uno y uno, pasimos por todas las situasiones. Tuvimos dias alegres, otros de merikias, oras buenas, otras tristes, anyos de rikeza, otros kon nada a la aldikera. Todo esto la pasimos la mano kon la mano, sin keshas y sin grandezas.

No vimos el tiempo pasar. No mos rendimos kuento ke los kaveyos mos se izieron blankos, ke yo ke era tanto flaka tomi unos kuantos kilos, y mi marido, ke no era flako, pedrio unos kuantos kilos. Yo tengo problemas kon mis ojos, el tiene kon sus patchas.

Lo ke no troko ande mosotros es el korazon, ke siempre bate, el mio para el y el suyo para mi.
Para markar este e
venemento tan importante para mosotros, el veinte-sinko Novembre 1995 arekojimos toda la famiya ke es grande ben parat yosef, en un salon. No te vo kontar komo era la sala, la musika, el servisio o el buffet. Ke todo era impekavle, por modo esto lo puedes topar ande keres kuando metes el presio. Lo ke kero dizir aki es la grande emosion ke touvimos este dia. iyamos de surprise en surprise, kada uno kijendo darmos una prova de kerensia y de amor.

La primera era la bendisiyon de Sheva Berohot ke mos dieron (
tenemos un haham en la famiya). Muestros ijos y niyetos (ondrados de ojo malo) kon la kantiga ke komposaron para mosotros disheron, ke son buenos y kerensiozos. Esto ya lo saviamos. El resto de la famiya kon los regalos uno mijor de otro y las palavras sinseras ke mos eskrivieron en el livre dor”.

Era un ermozo diya. La sola koza ke puedo dizir es un grande “merci” a todos.

Si lo digo aki es ke se ke todos te van a meldar. Sos el amigo de la famiya entera.

Un diya diche ke tuve una chikez horoza. Oy pu
edo dizir ke tengo una viejes horoza, rengrasio al Dios.

Lucie Chochana-Mazaltove


Comments