Gastronomie : Dolly i las keftes de su nona


El otro enverano torni a Selanik de onde parti a la gerra.

Naturalmente, kije ver la kaza onde bivi mi chikes.

Tornando al torno de lo ke fue esta (por ke oy no eksiste mas) me vino en el tino lo ke fue mi vida kon mis parientes ,i mis nonas.
Prinsipalmente me akodri de mi nona, una kozinera estraordinaria k
e no deshava a ninguno aserkarse de eya kuando gizava. Solo yo teniya esta favor ma eya me diziya siempre (komo en akel tiempo si gizava kon karvon) : “Salite de aki ninia, te vas a azer una kuerva preta”.

Ma yo me kedava a biklear 
1 komo azia. Esto me servio asta agora i me akodro de toda la komida tradisional sefaradita.

I oy vamos a dizir komo se fazen las keftes de puero (los stamboulis dizen “albondigas de prasa kon karne”) ke se komen tambien a Rosh Hashana i a Pesah. Para estas fiestas se empleya matza al lugar de farina i pan.

Por 20 keftes se kyere 1 Kg de puero (prasa) ke se lavan bien i se kortan en pedasos.

Se mete a kozer kon agua i sal 30 puntos.

Despues se eskoren bien para kitar lo mas de agua posible. Se pa
san a la “moulinette” para azer una purée. Meter esta purée en un tendjere
2  i mesklarla kon 250 gr. de karne molinada i un poko de miga de pan mojado, 2 guevos kon un poko de sal i pimienta.

Kuando se mesklo todo, formar las keftes i pasarlas en la farina i el guevo batido.

Meterlas a friir en una sarten en azeite.

Estas keftes se komen yeladas o kayentes kon una esprimida de limon.

Se pueden azer tambien kon espinaka pikada kon kezo blanko i guevos.

Agora buyrun
3 a gostarlas.

Dolly Benozio
Comments